وجيعة يوسف عبد الله الأخيرة

إنت عارفة يا نوارة أنا مشتاجلك قد إيه،ربنا يعلم إللي انطوت عليه الضلوع يابت خالي،لكن ما باليد حيلة،الشغل مع الريس أبو علي خربط لي حياتي،وإنتي عارفة إننا لازم نرجعو ونتكلمو مع أبوكي عشان نتجوزو،وإنت عارفة إني مش هنجدروا نرجع غير لما نلم فلوساتنا..

ده يمين أنا حلفته وأنا طالع م البلد،وإنت عارفاني لما بعند بعند،وأمك دايما تقول عليا يوسف"..الحرون"..أنا بكتبلك بالليل من شجة عابدين،بدني خلصان من اللي بشوفه،وولاد الحرام كتير في الشغل،وحبة عيال بحاروة فلاحين لؤما،مفيهمش راجل واحد يدخل دماغنا،آني حلفت بعد أسبوع من الجعدة هنا إن الصعايدة هما أحسن ناس في البلد دي وربنا خلجهم يطهر بيهم أوساخ العيال البحاروة.

المهم يانوارة،أنا محتاج أصارحك بكذا حاجة: أولا الطاجية اللي جبتهالي من مولد سيدي عبد الرحيم،ضاعت مني،و الخاتم الفضة والمشاءلة انكسروا مني ،غصب عني يابت خالي وحبيبة روحي،انا م البداية كنت بخبي عليك الحاجات دي،كل هداياكي كانت بتتكسر مني او تضيع،ف الاول قلت حسد،بعدين قلت عمل،روحت هنا وزرت أم هاشم وسيدنا الحسين،ودعيت،ونمت جنب مقام السيدة،شوفت وانا نايم،إني نزلت م الجطر وجاي جري أجابلك عند زرعة خالي حربي،جُبلي الجبانة،وبعد ما خطيت ترعة صديق،رجلي عترت في حجراية في الارض،وجعت علي وشي،وإنت جاعدة تحت السجرة بتطبخي،أناديكي مسمعانيش،أصرخ وإنت ولا هنا..بعدين جالي جدي يحي وخد بيدي وجومني،وإنت ولا هنا،ومسكني من يدي وروحت معاه مولد سيدي عبد الرحيم.

جمت م النوم بعيط يانوارة،أبكي بكا النساوين في الدفنة،استهديت بالله واتوضيت وصليت العشا جنب مجام رئيسة الديوان،جاني راجل طويل وعريض ما شفت حد في نوره ولا هيبته،جالي ياولدي يحلها الحلال،بكيت في صدره وحكيت له الحلم،سكت وجالي كل شي قسمة ونصيب ياولدي،جلت حرام يا عم الشيخ يحصل كده،جاللي فين طاجيتك وخاتمك،وسابني ومشي،ضربت كفا بكف يانوارة واستعوضت ربنا..

أنا بكتبلك الجواب ده رغم إنك مردتيش علي 4 جوابات جبليه،وإنت عارفة ده يحز في نفسي ازاي،فاكرة لما كنتي تجولي أهرب منك يا يوسف ومتعرفش فين مكاني وتضحكي لما كنا عيال صغيرين؟

فاكرة لما جلتلك اعمل زي دبور في "ذئاب الجبل" وأمشي في النجوع أجول بت زينة وجميلة ضفايرها سودا ومشيتها متعجلة وعلي يدها وشم الهرم..فاكرة يانوارة؟

نوراة يابت خالي،الراجل مننا ليه كرامته،ولو الحب داس علي كرامة الراجل مننا يا إما يبقي حرمة،يا إما يدوس علي جلبه وحبه،ويخلع ضروسه من الجهر ووجع النفس،وإنت عارفاني،ضربت عمي حسان وأنا صغير ومرضيتش آكل 3 أيام من بيته ولا بيت جدي لما ضايجني عمي في غيبة أبويا،أنا جلت لنفسي وجتها،بقي أنا يوسف بن عبد الله أبو هاشم يتزعج فيا؟ حتي لو كان اللي زعج عمي،إنت عارفاني من صغري وأنا إنفي ويجولوا عليا حساس ومتكبر..

نوراة يابت خالي،لو مردتيش ع الجواب ده،وأنا بجول لنفسي يارب ما ترد وأحزن عليها وأخلع ضروسي م الحزن واعيش بكرامتي ،فأنا مش هكتب لك تاني،وكم من راجل جلبه انفطر علي حبه،لكن ما من راجل جلبه انفطر فطرتي علي الشجاج ما بيننا يابت خالي،وإنت عارفة بدل البت عشرة وبدل المرة مية تتمني تترمي تحت رجلي،بس انا وفي ليكي،ولو الوفا حملني حمل ما تطيجه الجبال

المخلص:

يوسف عبد الله

القاهرة

عابدين

مارس 1988