عزيزي ربنا..نردهالك في عبادك

عزيزي ربنا..

تحياتي البالغة ..وكامل محبتي قبل أي شيء..

بالطبع أنت تعلم ما جري لي في الجمعة الماضية،حين جئت بورقة وقلم،وكتبت ما ارتأيته مميزات في اتباع أوامرك وعبرت في نفس الوقت عن ضيقي ببعض قيودك عليّ،وتذمرت بعض الشيء من بعض نواهيك..

للأسف ياربنا..وبعد حساب منطقي مرير،اكتشفت أن أتباع أوامرك والانصياع لمنهجك بصورة تامة كان هو المخطط الاكثر تحقيقا للمكاسب والاقل في خسائره،وقد تفوق منهجك علي باقي المناهج التي طرحتها كبدائل مجدية..أقول لك أن منهجك كان الأكثر ملائمة بجد..

أنا بيني وبينك زعلان لأن كان نفسي أنفك من قيودك وأحبك من بعيد لبعيد كده،أو أبقي ابن كلب وأنساك،وتبقي علاقة عرفية،بس أنا عارف نفسي،من يومي وأنا بتاعك انت،ومتنيل علي عيني ومعرفش أعمل حتة معصية صغننة قد كده..وأرجوك متفكرنيش بالمعصية إياها..عارف إني لما بشطح بنطح..

طيب اذا كان المنطق بيخليني أرجع لحظيرتك،فضلا عن نزوعي إليك وإلي عالمك مذ كنت طفلا ،الواحد مننا بقي يعمل إيه في الدنيا دي؟..بص أنت أدري بيا من نفسي،لكن فعلا الواحد مننا بتيجي عليه ساعات يبقي عايز فيها يكون ابن كلب وعاصي وملوث..

أنت تعلم أن طبيعة العلاقات بيننا_أنا وأنت_ تخطت حدودا كثيرة،وأنا اعتبر نفسي واحدا من رجالتك،ومن الناس اصحاب الامتيازات من وسط كثير من قاصديك،ودعني أصارحك_وأنت تعلم ما في نفسي طبعا يارب_ إني بحس إنك بتفرح أوي وأنا بالذات بين أيديك بصلي،يمكن أنا أحسن واحد بيصلي في كل العباد اللي خلقتهم دول..آه والله...ومن غير ما حد من الملايكة يبدي اعتراضه..أنا متدلع منك لدرجة إني أجهر بالكلام ده عادي عيني عينك كده،فضلا عن فورة المزايدة التي تتقد بداخلي في مثل هذه الامور..أصل مفيش حد بيبقي مبتسم وفرحان بالطريقة دي وهو بيصلي ..معلش يعني ..يارب ده أنا وصل بيا الامر اني بسرح في الصلاة واطلع اجري ابقي عايز احضنك..متخيلك قدامي.. حد منهم عمل كده؟

أكيد أنت فاكر يوم التلات اللي فات لما انا كنت لابس الجلابية السوداني الواسعة ووقفت اصلي المغرب..وقعدت ارفرف بإيدي زي العصافير وعايز أطير من الفرحة...أرجوك متحاولش تقنعني إن حد بيبقي فرحان كده ومقبل عليك بالصورة دي..أرجوك متحاولش..أي نعم انا ببقي سرحان في 60% من الصلاة وببقي بفكر في حاجات تانية هبلة..بس برضه..العبد مننا ليه وضعه بين إيد ربه..وميتساوش واحد من رجالتك وهو واقف بين إيدك بأي حد تاني..حتي لو كان مركز في صلاته وبينفذ عباداته زي ما الكتاب بيقول..وبيني وبينك أنا بحس إن الناس دي خنقة أوي..

حد فيهم قالك نكتة قبل كده وهو بيصلي لما حس إنك زعلان؟_أو غضبان وفقا للتدقيقات اللفظية التي تمليها أصول العقيدة..انا عملت..سيبك طبعا من هبل الكلام ده كله..بس انا عارفك بتفرح أوي بالحاجات دي..أصل الرب إيه يفرحه من عبده غير الاخلاص؟ وكل واحد بيخلص علي قد فهمه..

بص ياحبيبي ربنا..كل محاولاتي في الخروج علي منظومتك،وكلها محاولات تم تقييمها علي أسس منطقية تامة،باءت بالفشل..إنت عارفني ...أحب احسب الدنيا بعقلي في المواضيع دي تحديدا..

ومن ثم أحب أقولك إني وصلت إن العبد مننا ملوش غير ربه..هيروح فين يعني؟

فلنجدد اتفاقتنا ولنعتبر أن ما حدث في الجمعة الماضية سحابة صيف،أو تجديد حقيقي للعلاقة..أي نعم قيدك أدمي معصمي..بس يعني هيبقي في قيد بجمال قيدك يعني؟ ده إنت ربنا يارب..

حبيبي ربنا هذا الخطاب أسوقه إليك علي الملأ..مش عشان أحرجك_ليس من صفاتك أن تتعرض للحرج أدرك هذا جيدا_(لكن سامحني لما أحب أعبر بألفاظي الارضية المحدودة)..بمقدار ما أسعي لتوريطك_أعلم أنك لا تتورط_ في قعدة العرب التي نصبتها في الفضاء السيبري علي أوراق هذا الخطاب_ في منحي مزيدا من الامتيازات وفي المضي قدما في منجهتي وتحلية حياتي..فأنت تعلم كم أصبحت العيشة صعبة..وكم صارت النفوس شريرة..وعبد مارونج لاسيه زي حالاتي مينفعش يعيش وسط كل ده..

حبيبي ربنا..مزيدا من القرب..مزيدا من الامتيازات..ونردهالك في عبادك..ما أنا عارفك تحبهم أوي...

عبدك حبيبك

أحمد