90s fm

الأحد، 31 ديسمبر 2006

خلف الكواليس "القائل علي طريقته"



ألقي القفازات من يدي،وأرتمي أخيرا،لازلت أنهج،لكن الراحة

آنت،دنت،حان حينها،أفوز بال "جيم".

سنة 2006 مرت دون أن أجن أو أنتحر أو أصاب بالا كتئاب الحاد...
أصعب سنة في حياتي علي الاطلاق..

أكتب هذه المرة عن أصدقائي.. مالكي أكثر من 51% من أسهم الشركة المتخصصة في توريد منتجات البهجة والسعادة لشخصي..

أكتب عنهم ويملؤني الخجل،مش عارف أقول إيه عنهم..الناس دي أنا بحبها أوي وبتلعب دور مهم جدا في حياتي..أنا تقريبا لا أكاد أري لنفسي لازمة ولاقيمة في الحياة من غير ابتسامتهم ومن غير مساعداتهم ومن غير الأنس الذي تستشعره نفسي بمجرد وجود هذه "الكائنات" اللطيفة!!

"الكائنات" دي هي اللي أنا بمساعدتها قدرت أعيش السنة دي ومحصليش حاجة..

هكتب الأول عن المجموعة اللي عرفتها السنة دي..وبعد كده عن أصحاب الادوار الدائمة من قبل السنة اللي ما يعلم بيها إلا ربنا اللي اسمها 2006..


شيماء(في بداية 2006 أظن في يناير او فبراير):لا يخامرني شك في امتلاك هذه البنت السماوية لتوكيل حصري للطمأنينة في الكوكب الأرضي..كيف أتحول معها من غاضب ساخط إلي راض هاديء مطمئن ..لا أدري!!

أتحول معها إلي كائن أليف..ِأشعر معها وكأن وجنتي تلامس سطح بطانية ناعمة ورقيقة في ليلة شتوية تتحول الي جنة في غرفة كريمية الألوان يقبع هنالك في ركنها دفاية تبتسم!!

تتكلم لغة غريبة جدا في تكويناتها سواء علي المستوي اللفظي أو مستوي تركيب الجملة ذاتها،ببساطة لقد كانت هذه الفتاة الشاهد الوحيد علي لحظات قلائل لم تتكرر خلال هذا العام أكثر من 4 مرات التقت فيها روحي الأرضية بلمسات السماء الحانية..ربما كانت أكثر من شهد مثل هذه اللحظات معي،إذ أنها في حياتي كلها لا تتعد 12 مرة!!
فقط أشكرها علي وجودها الذي يشبه كثيرا فازة زهور شقية!

داليا (1 مارس): لماذا آمنت بأحلامي في الحياة بهذه السرعة؟ بهذا اليقين؟ بتلك الأريحية؟ لماذا قررت أن تحلم لي بتحقيقها رغم أنها تري مني شابا كسولا متراخيا مهملا كقبيلة من الدببة الروسي!!

كثيرا ماحثتني علي المذاكرة(أيام الكلية) ،حاولت أن تجعل مني انسانا ملتزما قلوقا مهتما بمستقبلي أزيح الجبال الرواسي من مكانها وأغوص في أعماق البحار لا أهدأ بالا ولا أكل ولا أمل..لكنها كلت وملت وحطت صوابعها في الشق مني.

أظنها أصبحت علي شيء من العبثية والبوهيمية من كثرة حديثها معي،أي نعم تعرفت إليها في آخر سنة ليا في الجامعة لكن التواصل بيننا استمر الي الآن ولله الحمد..
تحملت الكثير مني،خاصة في فترة الانتكاسة التي امتدت من اول اغسطس حتي بداية ديسمبر،كنت سخيفا باردا،وكانت في منتهي الهدوء معي،إلي أن عدت لسابق عهدي،أتمني لها كل خير في حياتها، صديقة وفية تساعد بكل إمكاناتها.

أحمد ندا(20 مارس): مفاجأة قدرية في حياتي،تعرفت عليه في إفيه من إفيهات الزمن التي لا تتكرر في القرن الواحد مرتين، أحبه بإخلاص،يحبني كثيرا،علي خلاف دائم في الرأي ،رغم أنه تأقلم معي بسرعة،هاداني بكل ماتمنيت قراءته.

كذلك أحضر لي 3 تي شيرتات أثناء سفره الصيف الماضي للسعودية،واحد منها أحمر،ولأول مرة في حياتي ألبس اللون الاحمر ده..كنت بلبسه وأنا مكسوف أوي،ولكن اتضح لي فيما بعد أن للون الأحمر مآرب أخري..أبسطها إنك لو عديت قدام مدرسة ثانوي بنات هتتعاكس هتتعاكس!!

يظن أنه يعلم سر خلطتي في الحياة والكتابة والفهم و و و و..لكنه مسكين لا يدري سوي المكونات الاولية فقط(نيهاهاهاهاها)، ساعدني كثيرا،افتقدته حين سافر السعودية في الصيف ،يوما ما سيعلم مقداره في قلبي وأنه زي ابني الصغير..بس ابن كلب الصراحة وانا مربتهوش!!.

تمضي الحياة بي وبه،لشد مايؤرقني طبعه "الغتيت" في تفتيش نوايا وضمائر ولا شعور الآخرين..فتش يا عم احمد ولكن في السر،متحكيش ليا البلاوي دي كلها!! يصر علي ايذائي بالاتصال بعد الساعة 11 بالليل رغم معرفته ان عندي ارتباط شرطي سيء باتصالات الليل..لايرحمني..لايرحمني لايرحمني..الله يرحمه ويسامحه..من أحب الناس الي قلبي دون شك.

البراء أشرف(نهاية أبريل): الفتي الجارف المحبة،خفيف الظل،رومانسي الطوية،فسيح الخيال،رفع عني الكثير من العبء بإيمانه بنفسه وإيمانه بي،طمأنني مؤقتا ،أضحكني كثيرا،استفدت منه جدا.

أري فيه بعضا مما كنت آمله في نفسي لكن هذا البعض ضمر بفعل الزمن وتلاشي،أنتظره في المستقبل،بعد ثلاث سنوات واسع الشهرة يحمل علي يده بنوتة صغنططة هيبقي اسمها اي حاجة غريبة كده(الفسيفساء البراء اشرف مثلا)،براء أنت جدع أوي وراجل اوي،وأعتز باليوم الذي عرفتك فيه،أشكرك علي إنك البراء أشرف..

مصعب أحمد(بدايات يونيو): الفتي الآينشيني النزعة،أجمع الكل أنه ينقصه جناحا ملاك وهالة نورانية!! تشعر أن مصعب و "اللاب توب" بتاعه توأمان ملتصقان!! مصعب طيب ومسالم(حوت بقي)، خفيف الظل سريع البديهة.

حين تلقي إفيه أمام مصعب يضحك بعد التوقيت المفترض للضحك بحوالي 20 ثانية،يبدو مصعب وكأنه يحسب الأمور منطقيا بداخله،لقد القي أحدهم افيه،وأنا أقيم هذا الأفيه.. إنه ظريف وهذا لعدة أسباب منطقية لا يوجد لدي الوقت الكافي لسردها،يفترض بي أن أضحك..اذن فلاضحك الآن..هههههههههههههه..دوما مصعب اخر من يضحك!!

أحمد الهواري(بدايات يونيو): اكتشفته بغتة!! في نهاية هذا العام اكشتفت أني ضيعت مني صديقا رائعا،انشغلت بالانشغال عنه طوال فترة عملنا سويا،وبعدها بثلاثة شهور اكشتفت أنه_وياللخديعة_ حوت..حوت ..حوووووووووووووت..تقاربنا سريعا،تواددنا بعمق، نحاول سويا التمرد علي مآسي مشتركة،أنتظر لنا مستقبلا في الصداقة ملؤه الاخلاص...

جيمي هوود(قبيل منتصف ديسمبر): أنا لسة هكتب عنك حالا ياجمي ومش عارف أقول إيه..بس في فيلم شغال جنبي في التلفزيون "عيال حبيبة"..أول ماجيت أكتب عنك لاقيت حمادة هلال بيغني ويقول ده طيب أوي ده حنين أوي!! وأنا أحترم جدا رسالات السماء!!

طلال فيصل(في العشر الأواخر من ديسمبر):عرفته في ملابسات عجيبة كشأن باقي معارفي،أراه بعد 4 ايام من المعرفة نقيا ذكيا وأعول عليه كثيرا كثيرا كثيرا..طلال كن هنا علي الدوام..صدقني حدثني حدسي اني سأعرف احدا ما في نهاية هذا العام سيكون فارقا معي..أنت هو يا فيصل فقد ظهرت علاماتك تباعا..
أما أصحاب عن أصحاب الادوار الدائمة
أحمد فؤاد الدين: ببساطة هو الصديق الذي أثق أنني إن مت فإن للبيت رب وللطفل أب!! مثابر عنيد صلد مدبر،لو أن أسدا هاجمني في غابة أول من سأفكر فيه فؤاد،لابد أن جوجل قدمت اليوم تقريرا مثيرا عن كيفية مواجهة الاسود في الغابة دون معلم وبالطبع فقد قرأه فؤاد.

لو أن الكمبيوتر بتاعي باظ أنا متأكد إن فؤاد هو اللي هيصلحه،فؤاد ممكن لو البروسيسور باظ_لاقدر الله_ يحط مكانه قطعة من مفاعل تشرينوبل ويشغل الجهاز،أكيد فؤاد راح العتبة اشتري أجزاء من مفاعل تشرنوبل، أنا مؤمن أن فؤاد يفعل كل شيء..كل شيء.

حنان الجوهري:هل لي أن تسامحيني ياحنان؟ كم مرة خذلتك هذا العام؟ كم مرة كان من المفترض أن أكون بجوارك لكني كنت مرفوع مؤقتا من الخدمة؟ أنت تعرفين أني أخوك الذي لم تلده أمك،لكن الأخ ده كان في أسوأ فتراته النفسية السنة دي..احتجتيني كتير وكنت أنا تايه وساكت..قصرت في حقك كتييييييييييير أوي.

كم مرة بصيتي في عيني عايزة تتكلمي معايا وأنا أبص في الأرض أو أعمل نفسي سرحان عشان عارف إني مش قادر أساعدك،أنا لما ببقي محبط أو زعلان مببقاش هنا في الأرض، أنا لما ببقي زعلان بحب ان كله يسيبني وميكلمنيش وأنا أفوق لوحدي..إنت عكسي تماما ومش عارفة تقدري ده ياحنان ياحنينة.

فؤاد قالي حاجة عبقرية جدا فهمتني طبيعة خلافاتي معاك..قال:أحمد الدريني فاهم الدنيا كلها ماعدا حنان الجوهري..وحنان الجوهري فاهمة الدنيا كلها ماعدا أحمد الدريني!!
دايما بفتكرها لما كانت تيجي بعد الأكل وتقوللي متشربش شاي عشان الحديد اللي في الأكل ميروحش..ومن ساعتها كل ما آجي اعمل كوباية شاي بعد الأكل أفتكر حنان..فاستني شوية..سامحيني علي تقصيري بس مش بإيدي..ربنا يوفقك..

دعاء عادل:كانت رابضة في رحم القدر حتي بدايات نوفمبر الماضي..صديقة عزيزة جدا،وأكتر من أخت،وحاجات كتير،لكن فجأة دعاء قررت إنها تتدخل في حياتي بصورة مش عادية،أظن أن تدخلها بإشارة قدرية!!

دعاء عملت معايا في آخر شهرين من السنة دي اللي محدش عملوا معايا طول حياتي،وقفت معايا وقفت عشر رجالة،ياااااااااااااه من غيرها مكنتش عارف هجتاز الفترة السيئة دي إزاي،عملت كل حاجة،اتصلت بيا وقابلتني وكلمتني ع المسينجر.

شدت من أزري في كل لحظة يأس،صبرت علي ضيق صدري بالناس كلها،لم تتهاود مع بوادر فقدي ثقتي في نفسي والناس،كانت علي قدر المسؤولية بما يفوق توقعاتي وتوقعات كل من يعرفها،أبدا لم تكن طفلة ولا هبلة..
أنا مش عارف أقولها إيه..لكن بفتكر تجاه اللي عملته معاي قول السيدة زينب :
"وكم لله من لطف خفيّ..يدق خفاه عن فهم الذكيّ"

..عمري ماتوقعت منها كل ده..وقفت معاي وإدتني كتيييييييييييير..أشكرها بإيه بس؟ أعملك إيه يوفي حقك؟ يمكن انت أحسن حاجة اكشتفتها السنة دي..كنت أحسن من كل أقراص الريفو والباندول والباراسيتيمول.

كنت دش مية دافية وجلباب أبيض لابسه بعد الدش وغرفة منظمة وبخور هاديء وعطر خفيف علي وجهي وموسيقي هادئة في غرفتي..أشكر وأحمد الله ع اليوم اللي عرفتك فيه..

أميرة حسن:ببساطة..كلما تشوشت صورة الموقف الجأ إليها..أميرة سيدة الآراء المختلفة،لايشترط أن تكون صحيحة..فقط أن أريد منها نظرتها المتميزة للأمور وجسارة إطلاق الأحكام التي تتسم بها حيال كل ما هو إنساني.

اكتشفت أميرة حينما كتبت واحدة من أروع ماقرأت من تدوينات "أسطورتهم أني أحبهم"..واكشتفت ساعتها فؤاد برضه ياللمصادفة!! أميرة إنت اكيد نيتك صافية عشان عظيم زي حالاتي يقوم بدور محامي ليكي من أول يوم عرفك فيه.(نيهاهاهاهاهاه)

شادي احمد: هو مرآتي التي أنظر إليها،الوحيد الذي أشعر أنني إذا مدحته فأنا أمتدح نفسي!! شادي و أنا روحان ممتزجتان..متطابقتان..ظمأهما واحد..وريهما من نبع واحد..،مش هعرف أتكلم عنه وهو عارف السبب..كل حقيقة إذا ما جرت علي اللسان انتفت عنها الصفة يامولاي شادي..

بعد كده في ناس تانية بتلعب أدوار متابينة الأهمية في حياتي..أنا ممكن اتكلم عنهم عادي،لكن أجمل مافيهم أن أدوارهم بسيطة ومش مركبة زي الناس إللي فوق،أدوار جميلة وهادئة مش عاصفة..يمكن عشان كده مش هعرف أقول غير إني بشكرهم علي وجودهم...

إيهاب دسوقي وأميرة هشام وهبة ربيع وأميرة جاد وأحمد سمير وسيد تركي..
وآخرون فليعذروا ذاكرتي المنهكة إلي أن أسترد كامل عنفواني النفسي والبدني في أقرب فرصة..وقد دنت وفق ما سربته إلي

روحي من أنباء ال............!

هناك 14 تعليقًا:

دعاء عادل يقول...

احمد
انت اهم حد فى حياتى واهم حد عرفه من يوم ما اتولدت حتى الان ووصلت لمكانه محدش غيرك قدر يوصلها ولا حد ها يعرف يوصلها عارف مهما اشرحلك عمرك ما هاتعرف
انا بحمد ربنا عليك كتيييييير اوى
ومش عارفه اقولك ايه
انت عارف

Bassaminoff يقول...

وهكذا احتفل الدريني بعيد الأضحى وراس السنة

أتذكر اني في مثل هذا اليوم راقفت ثلاثة أصدقاء وافترقنا في المترو

أنا مكنتش رايح أي حته ليها علاقة بالمترو أو ملهاش

فجأة توقفت على منتصف كوبري قصر النيل وسمعت صوتا فلاشباكيا يصرخ: إذا كنت تحبني فاقفز من هنا

نعم أحبك ولكني لا أستطيع القفز

نعم احبك ولكن العام قد انتهى ويفترض بي أن أعد كشف حساب السنة اليوم

رغم خروجنا من امتحان الاقتصاديات المهبب يا دريني هه

كان لازم اجهز كشف حساب 2005

ودلوقتي بنقفل كشف حساب 2006

أصعب سنة في حياتي انا كمان

مش عارف اسميها ايه بصراحة

وإن كان لي أن أرد فسأشكر كل الموجودين على وجودهم في أماكنهم حتى الآن
وأشكر كل الراحلين على أنهم رحلوا غير مقصرين في حدود طاقاتهم معي

وأعتذر لكل الذين حملتهم فوق طاقاتهم وللذين سأحملهم لأني لم أعرف بعد حدود طاقاتهم

وإن كنت لا أستطيع الرد كما قال الدريني في مقاله هذا

فكل يوم من أيام هذه السنة حمل الكثير
وإن كان هذا الشهر هو الأصعب فيها

تتشابه المواقف وتختلف الاسماء ويبقى الأصل

لن أقول أصدقائي الأعزاء، بل أبنائي الأعزاء شكرا، لكل من منحني برهة من وقته أو كلمة من كلماته أو مازورة من موازيره الشقيه أو حتى أبقاني على قائمته حتى الآن

شكرا لك أيتها المخلوقات الأبدية
أدام الله علينا صداقتنا

نلتقي في ذكرى سقوط الأندلس

أحمد فؤاد الدين يقول...

دريني العزيز مش عارف اكتبلك ايه بس فعلا جوجل كان عليها موضوع عن كيفية مواجهة الأسود و قرأته نياهههههههههههههها

elkamhawi يقول...

جامد البوست ده وهقولك حاجة مش جديدة اسلوبك رائع بس والنبى سؤال انتا قلت::مالكي أكثر من 51% من أسهم الشركة المتخصصة في توريد منتجات البهجة والسعادة لشخصي..؟؟

ممكن اعرف ال49 التانين فين ؟

Amira Hassan يقول...

معلم دريني ..أكلت اللحمة و لا لسه..كلها عسى الله انها تجيب تأثير يعني نيهاهاهاها

انا عايزة اقولك اني فطست م الضحك و انا بقرا البوست ده..رغم انه المفروض ميضحكش يعني..بس ضحكت لما قلت على موضوع مواجهة الاسود في جوجل ده و لما قلت على مصعب انه بيضحك بعد شوية..و اتاثرت في جزء حنان كله..ميرسي جدا انك حطتني اساسا في الليست دي ..و ميرسي انك شفت فيا حاحه انا اساسا مكنتش اعرفها:)..كل سنة و انت طيب يا جميل و السنة دي ان شاء الله تبقى رئيس تحرير و تمسكني صفحتين عندك و تمسك فؤاد قسم التحقيقات عشان انت عارف ان فؤاد عبقري في التحقيقات يعني..و عشان نبقى مستقلين بذاتنا بقى و طبعا دعاء و حنان و ايهاب الدسوقي هيبقى ليهم صفحهم الخاصة ..شد حيلك بقى عشان ربنا يتوب علينا..و يارب برده السنة دي تعرف كل الحقائق الخفية التي غابت عنك في السنة الماضية..هتقولي هي ايه..هقولك معرفش..اكيد في واحدة يعني..نيهاها هاهاهاهاهاها

shimaa يقول...

أنا اللي أنت بتقول عليها ديه؟؟؟

مش عارفة..مش ها أقدر أرد عليك في الكلام اللي أنت قايلة عني ده..بس ممكن أقولك أن أنت من أكتر الناس اللي ببقى حاسه بالطمأنينة ديه و أنا بتكلم معاهم..أنت أنسان بجد يا أحمد..مينفعش حد يعرفك من غير ما يحبك..يارب افضل موجودة في الليست دية السنة اللي جاية ان شاء الله و ابقى من أصحاب الأدوار الدايمة في حياتك..
و ان شاء الله السنة ديه تكون احسن من 2006 بمراحل و تضيع أي مرارة حسيت بيها في 2006 ..
ف الاخر أحب اقولك مبروك مقدما..هتقولي على ايه..ها اقولك بعدين ..في وقتها ها ابقى أقولك..إحساسي بيقولي أن فيه حاجة هتحصل و أقولك عليها مبروك قريب
على العموم أنت تستاهل كل خير

مُصْعَب إِبْرَاهِيم يقول...

هي فعلا كانت سنة برد جدا جدا.. علشان تخليك تلبس قفازات وترميها آخر السنة.. متعبة بجد

ثانيا : أنا عاوز أعرف أنا أسهمي كام بالظبط!

ثالثا: يبدو أن هذه الكائنات هي التي استطاعت أن تعيش بوجودك، وليس العكس.. أنت يا عزيزي لا تستطيع العيش بدون "كائنات" تطببها وقلوب تحنو عليها وإن بدا عكس ذلك حتى لك أنت شخصيا..

رابعا:وصفك لي هو أكثر وصف دغدغني من داخلي بشدة ونعومة في الوقت ذاته.. لست أدري كيف أشكرك

أخوك: مصعب أحمد بدايات يونيو محمود!

We2am يقول...

طيب..لا مكان لي هنا..طبيعي يعني مش قصة.الحمدلله اصلا! :D
انما بما اني اعرف اللي بتكلم عنهم نفر نفر-الا انت سبحان الله-فهما كده فعلا..وفي ناس طلع فيهم حاجات جديدة الصراحة.. :D
ربنا يخلي الجميع للجميع يا احمد باشا..ويكرمك..ويكرمني و افهم تعليقات باسمنوف! :D

مُصْعَب إِبْرَاهِيم يقول...

أنا بس عاوز أسأل سؤال يا وئام.. هو اللي مش مفهوم في تعليق بسام؟!!

غير معرف يقول...

ايه دا كله يا عم احمد بجد انا مش قادر اقولك حاجة غير انك انسان رائع
بتعرف تقرا الناس صحيح مع لكن هذا لا يمنع ان لكل جواد كبوة
بالمناسبة انا بحب دعاء وفؤاد وحنان يمكن زيك واكتر بس عمرى ما كنت هاقدر اكتب عنهم زيك
كل سنة وانتم كلكم طيبين اللى انت اتكلمت عنهم واللى نسيتهم
ومبروك انك اخيرا لقيت نفسك
وبعد كده خد بالك من نفسك
كل سنة وانت طيب
اكيد انا من ال49% الباقيين مش كده

اميرة هشام يقول...
أزال المؤلف هذا التعليق.
أحمد الدريني يقول...

يا استاذ خالد...لقد أبديت لك في تديونات سابقة (بعضا) مما أكن لك..وإني لأخفي منك أضعاف ما أبدي يابوعلي

غير معرف يقول...

صباحه سودانى مقشر
بص يا احمد
انا
انا
انا بعزك قوى
واحيانا باكرهك
لكن
دائما
ما احبك
بطريقتى00وانا اعنيها
"بحبك يا كاظييييم"
..وانا كمان بحبك يا استاذ خالد يا بلشى
حنان الجوهرى

dead man يقول...

بص أنا مش عايز أعرف أسهمي كام بالظبط.. علشان سهم واحد في شركة أحمد الريني الا محدودة يساوي عندي كثير أوي..

أما عن أسهمك أنتا بأه عندي فدي أكثر من أني أعدها.. كفايو وقفتك جنبي في الفترة اللي فاتت